Begibistakoa da denbora batetik hona inguruko kale, auzo eta hirietako hainbat lantegi, denda eta bestelako aktibitate ekonomikoa garatzen zuten askok beraien jarduera eten dutela. Baina honen aurrean, badago zer egin ere.
Erabilerarik gabeko espazio huts hauek praktika artistiko, sortzaile zein kulturalen bidez birmoldatzearen joera goraka doa eta honen eredu dira nazioarteko ekimen ugari. Gehienetan espazio komertzial hutsetan edota balio historikoa duten berreskuratutako eraikuntzetan garatzen dira, iabeti tokiko komunitateentzako onuragarriak diren proposamenak izanez.
Recess, NY
Denda huts batek hainbat erabilera izan ditzazkeela azalean uzten du ekimen hauetako bakoitzak. Besteak beste; kausa bat sustatu, dohaintzak bildu, ideiak testeatu, prestakuntza edo ikastaroak antolatu, komunitate-proiektuak ezarri eta ekitaldi edo erakusketak ospatu daitezke aktibitaterik ez izatera igaro den espazio hauetako batean.
Saltoki izandakoei bizitza berria ematea errealitate egitearen kudeaketan Erresuma Batuko 3Space erakundea erreferentea da. Bere lana funtsean, proiektu bat martxan duen eta doako espazio apropos bat behar duen edozein erakunde txiki eta ondasun hutsaren jabea kontaktuan jartzean datza.
Denda hutsen erakuslehioak era askotariko artelanen aldi-baterako erakusketa-areto bezala erabiltzea oso bogan dagoen beste joeretako bat da, Chicagoko PopUp Art Loop eta Seattle-eko Storefronts Seattle ekimenen izaera hori delarik. Ildo berean, baina proposamen esperimentalagoa jorratuz, New York-eko Recess proiektu arrakastatsua, zeinek erakusleihoa ikuslegoari beti irekita dagoen arte sorkuntzarako espazioa bezala ulertzen duen eta artista garaikideei eskaintzen dien.
Halako denda eta biltegien pertsianak, mundu mailako graffiti egile esanguratsuenen lanen erakusketa areto bihurtu ditu Miamiko The Wynwood Walls proposamen berritzaileak.
The Wynwood Walls, Miami
Praktika artistiko, sortzaile eta kulturalei esker berreskuratuak izan diren, balio historikoa duten espazioei dagokionez, aipatzekoa da Beijingeko 798 SPACE. Iraganean estatuko lantegiak biltzen zituen eremu honek, nabarmen hasten ari den hiriko mugimendu artistikoa erakartzen du orain. Jatorriz Bauhaus eskolaren estiloan eraikia izan zen 798 SPACE-ren birmoldaketari esker, besteak beste, erakusketa eta ekitaldi nazional eta internazionalak, goi-mailako jarduera kulturalak eta merkataritza-jarduerak, moda-desfileak, hitzaldiak eta kontzertuak izaten dira bertan.
Joera beraren eredu da Torontoko Artscape. 80. hamarkadatik bertako kultura eta artearen sektoreetako espazioen kudeaketaren buru da eta eginkizun horrekin utzitako eraikuntzak birmoldatu eta artisten esku jartzeko lan egiten du.
Eremu berean kokatzen dira Le104, zein Pariseko hiletetako udalzerbitzuak eskaintzen zituen eraikina izatetik esperientziak sortzeko eta berrikuntzarako zentro kulturalean birmoldatu izan den eta The Deptford Project, berritua izan den tren bagoi zahar bat oinarri bezala harturik, inguruan sormen industrien proiektu sendoa martxan jarri duen Londoneko ekimena.
The Deptford Project, London
Era honetako ekimenek egungo jabetzaren kontzeptuari buruzko hausnarketa dakarte barneraturik. Beste herrialde batzuek berriki ezarritakoa eredutzat harturik, legegintzan egindako zenbait aldaketa aproposak izan daitezke hemen ere. Baliteke inguruko espazio hutsen kudeaketa bizkorrago hori, proiektu berrien sorrera emateko eta kontextu biziagoa lortzeko giltza izatea.
Birmoldatu: hutsarentzako bizitza berri baten bila artikulua, The Balde aldizkariaren 69. alean publikatua izan da.
nonahi.com 
